Chief Minister hian, Mizoram hian hun rei tak rambuai kan tawrh avangin hmasawnna hnathawh kan hmu tlai bik a. 5th Five Year Plan atang khan mumalin kan kal ve chauh a ni. Chuvang chuan state dangte dinhmuna ding ve phak turin sum leh pai mamawhna a sang hle. Sum mamawh te mahnia thawk chhuak turin state dangte angin Industry tihtham kan neih bawk si lova, ngaihtuah kan ngai hle a ni. 

Vawiinah state ralmuang tak ni tawh mah ila kan thenawm state te leh ram tea harsatna thleng avangin min rawn bel tura rawn lut kan ngah hle a, kan tan phurrit a tling. Tin, Security Related Expenditure (SRE) hi central sawrkarin min pek ve loh laiin kan thenawm state leh ram atanga hel (insurgent group) pawlte laka invenhim ve reng kan ngai bawk a. Peace Dividend siamsak kan mamawh a ni, a ti.

Chief Minister hian, a kaihhruai sawrkar chu Mizorama 'change' thlentir tum tlat an ni a. Chumi atana an mamawh hmasa chu sum leh pai tam zawk a nih avangin 2024-25 budget ah sum tam zawk pe turin Central sawrkar a ngen. 15th Finance Commission khan Mizoram tan Special Grant Rs. 546 crore a ruahman a, mahse hei hi kan la dawng kim lo nasa hle a. 

Tin, 2019-20 leh 2020-21 budget a Share of Taxes atanga Mizoram dawn tur Rs. 2370.80 crore zet kan la dawng lo bawk a. Heng kan sum dawn loh te avanga kan leiba (liability) te hi vawiin thlengin kan la chhawm si a. A chinfelna min dap sak thei ula kan duh em em a ni, a ti bawk.

Chief Minister hian 14th leh 15th Finance Commission ten rawtna an siam anga professional tax rate ennawn thuai tha a tih thu te, Centrally Sponsor Scheme sum te Single Nodal Agency a pek chhuahna dan chuan Central Treasury Rules a mil zan lo deuh nia a hriat thu te, Mizoram chu ram kilkhawr, nitin mamawh man to fal bikna a nih avanga Special Package pek a mamawh thu te, Exterally Aided Projects atana sum hmuh theih bithliah chu ennawn deuh thaa a hriat thu leh SASCI sum hman dan tur awlsam deuh zawk duan tha a tih thu te a sawi a ni.

Lalduhoma hian Union, state leh UT tin Finance Minister te chu, India chu ram intodelh zawk, hmasawnna inkhairual, state tin, hnam tin leh khua leh tui zawng zawng tumah ngaihthah bik awm lohna rama siam tura thawhho puiah a sawm, tiin Sorkar thuchhuah chuan a tarlang.